Master's Studies for International Students

Факултетот за информатички науки и компјутерско инженерство (ФИНКИ) при Универзитетот Св. Кирил и Методиј во Скопје е домаќин на првата BEiNG-WISE Летна школа. Настанот, се оддржува од 26-27 јуни 2024 година и е посветен на "Сајбер безбедноста и човечкиот фактор во ерата на напредни комуникациски технологии". Организиран од COST акцијата CA22104, школата обединува студенти, истражувачи и професионалци од Европа за истражување и решавање на предизвици во сајбер безбедноста. Учесниците се вклучени во интердисциплинарни истражувања и работа на практични апликации со цел унапредување на нивните вештини и знаења во ова критично поле.

Домаќини на летната школа се проф. д-р Весна Димитрова и проф. д-р Иван Чорбев.

За повеќе информации за школата, посетете го сајтот на акцијата BEiNG WISE.

По повод 13-иот роденден на ФИНКИ, на 02.04.2024 (вторник), со почеток во 10 часот, ќе се одржи роденденска трка.

Рутата на крос трката е дадена во прилог, стартот е во стариот дел на Градскиот парк, на кејот на Вардар (https://maps.app.goo.gl/PHaVSFXgNGhVDjjSA) се до влезот на Владата на Северна Република Македонија како симболичен чин со кој сакаме да ја истакнеме и подигнеме свеста за проблемот со недостигот на соодветен образовен простор за студентите на ФИНКИ.

Завршувањето на трката пред Владата ќе претставува почеток на мирен протест, каде ќе покажеме дека бројот на засегнати студенти е голем и дека барањето за подобрување на условите е итно и неопходно.

На 02.04.2024, поради трката и мирниот протест, нема да има настава за сите студенти на ФИНКИ.

Според најновата објава од Elsevier Data Repository објавена на линкот, нашите професори проф. д-р Билјана Ристеска Стојкоска , проф. д-р Марјан Гушев и Академик д-р Љупчо Коцарев се во листата на најдобрите 2% научници во светот според бројот на цитати на нивните публикации за 2023 година.

Истовремено, проф. д-р Марјан Гушев влегува во листата на најдобри 2% научници во светот во однос на публикациите и цитатите од целата кариера.

Овие успеси уште еднаш ја потврдуваат посветеноста на ФИНКИ на развојот на науката.

Им посакуваме на нашите професори уште позначајни успеси во иднина.

Во Крушево, од 4-6 мај 2023, се одржа 20-тата меѓународна конференција за информатика и информатички технологии CiiT 2023, организирана и поддржана од Факултетот за информатички науки и компјутерско иженерство (ФИНКИ). На конференцијата беа презентирани 38 труда изработени од приближно 100 учесници, од кои 30 се студенти на ФИНКИ, и евалуирани од меѓународниот програмскиот одбор составен од 63 членови. Дополнително, на конференцијата се одржаа и три поканети предавања од страна на д-р Ѓорѓи Стрезоски од Универзитетот во Амстердам, Холандија, д-р Светлана Кордумова Трајанова - oсновач и извршен директор на Pixyle.ai, и м-р Бојан Најденов од компанијата 44 EAST, Копенхаген, Данска.

Конференцијата ја отворија претседавачите на конференцијата, доц. д-р Бојана Котеска и доц. д-р Александра Дединец, заедно со деканот на ФИНКИ, проф. д-р Боро Јакимовски.

„Една од целите на ова конференција е поголемо вклучување на студентите во научните истражувања кои се спроведуваат на ФИНКИ. Ме радува тоа што бројот на квалитетни студентски трудови расти секоја година“, рече Деканот Јакимовски.

По повод јубилејното 20-то издание на конференцијата, на истата се обрати и претседавачот на првата CiiT конференција, одржана во 2000 година, д-р Смиле Марковски, професор во пензија. По читањето на првиот повик за трудови испратен до вработените на Институтот за информатика при ПМФ, Марковски изјави:

„CiiT за прв пат беше организирана во форма на состанок на кој вработените од ИИ требаше да споделат идеи за идни истражувања. Ми претставува огромно задоволство да сум сведок на денешниот успех на CiiТ, како и на традицијата која е воспоставена.“

Конференцијата финансиски е поддржана од страна на Универзитетот „Св. Кирил и Методиј“ во Скопје, Асоцијацијата „ИКТ-АКТ“, IReason, Netcetera, S&T Macedonia, ITigma, Iskratel, Integra Solution, Inteligneta, ITLabs, Musala soft и Винарија Стоби.

Денес Факултетот за информатички науки и компјутерско инженерство (ФИНКИ), промовираше нова генерација дипломирани инженери по информатички науки и компјутерско инженерство и нова генерација магистри. Рекордни 320 дипломирани инженери и 24 магистри, ги добија своите дипломи за завршен прв и втор циклус студии.

Деканот на ФИНКИ, проф. д-р Боро Јакимовски ја отвори свеченоста и се обрати на присутните:

- Знам дека патот до овде не беше лесен. Имаше препреки и предизвици, но вие покажавте дека можете да ги совладате и да продолжите напред. Нека овој успех ви послужи како основа за вашите идни постигнувања, и се надеваме дека ќе ги користите знаењето и вештините стекнати на ФИНКИ за да направите позитивно влијание во светот на информатиката и компјутерското инженерство, рече деканот на ФИНКИ, професор д- р Боро Јакимовски.

Тој посочи дека успехот и растот на ФИНКИ не се случајни. Тие се резултат на заедничките напори на студентите кои се стремат кон знаење и усовршување и на професорите кои ги инспирираат и ги поддржуваат.

- Нека овој момент на успех остане запаметен во вашите срца, и да ви послужи како поттик во вашите идни професии. Ова е само почетокот на вашата успешна кариера, и сме убедени дека ќе постигнете големи дела и ќе го промените светот низ вашиот талент, ангажман и страст. Заедно, да ги славиме вашите достигнувања и да ја оствариме заедничката визија за успех и напредок, порача Јакимовски.

Ректорот на Универзитетот „Св. Кирил и Методиј“, професор д-р Никола Јанкуловски, ја изрази своето огромно задоволство за промоцијата на инженерите и магистрите.

- Денес, од оваа говорница ја имам честа да Ве поздравам на овој свечен настан, на кој добивате верификација на вашите напори за стекнување на знаења и потврда дека сте успеале да го изодите патот што се нарекува студирање. Денес, нашата академска заедница е побогата со нови дипломирани и магистрирани инженери кои своето знаење го стекнаа на нашиот Универзитет кој е посебен по својот квалитет, традиција, втемелени академски вредности, но и по својата големина, проактивност и диверзитет. Новите технологии брзо се развиваат, стекнатото знаење мора да се надополнува. Образованието е континуиран процес, посебно во делот на новите технологии. Затоа Ве охрабруваме да го продолжите Вашето образование на магистерските и на докторските студии., порача Јанкуловски.
Во своето обраќање тој ги потсети дипломците и магистрите дека стануваат членови на големата алумни заедница на Универзитетот „Св. Кирил и Методиј“ во Скопје.

- Денес со вас се радуваме и гордееме сите. Ние, Вашите наставници и, секако, Вашите семејства. Сега следи уште една многу значајна фаза - натамошното градење на вашите животи, на кариерата, на натамошната академска надградба… Ви посакувам многу здравје и среќа во вашите избори на животните патишта!

Заменик на претседателот на Владата на Република Северна Македонија задолжен за политики за добро владеење, м-р Славица Грковска се обрати на студентите и во своето обраќање истакна:

- Можеби некои од вас можностите ќе ги побараат надвор од границите на државата, некаде каде ќе сметате дека вашите потенцијали ќе бидат повеќе вреднувани. Но, ве уверувам дека вашиот
профил е баран и соодветно вреднуван и овде, во Република Северна Македонија. Европската или американската плата може да се заработи и овде, во Скопје, во Куманово, во Охрид и каде било на друго место во државава, секаде онаму каде досега интернетот и неговите неограничени можности. Одлуката за понатаму е само ваша. Но, што и да одлучите, каде и да се насочите понатаму, се надевам дека ќе ви остане поривот да го помогнете развојот и на својата земја, на домот каде што сте пораснале и образувале. Како претседавач на Националниот совет за дигитална трансформација на општеството, свесна сум колку овие процеси зависат од луѓето како вас. Вашата улога е суштинска во времиња кога драстично се менува начинот на кој работиме и функционираме. Адаптацијата на промените кои ги наметнува технолошкиот развој, и во институциите, и во економијата е невозможна без потенцијалот кој вие го носите во себе.

На свеченоста беа доделени плакети и награди за најдобрите студенти на ФИНКИ, кои беа поддржани и поздравени од претставник на компанијата IWConnect, извршниот директор Миле Грујовски.

Статистиката на ФИНКИ вели дека просечно времетраење на студии на оваа генерација е шест години. Една петтина од дипломците завршиле за ефикасни 4 години и една половина за 5 години. Растот на бројот на дипломирани студенти во однос на минатата година е над 20%. Уште поважно, 46% од нив се девојки со што ФИНКИ е со рамномерна полова застапеност.