Роденa е 1974 година во Скопје. Основното и средното образование го завршила во Скопје, со континуиран одличен успех. На студиите по информатика на Институтот за Информатика при ПМФ, применета насока дипломирала во јуни 1997 со дипломска работа од областа криптографијата под наслов “Софтверска реализација на безбедна комуникација со C модули под UNIX” под менторство на проф. д-р Смиле Марковски, редовен професор на ПМФ. Во текот на школувањето примала стипендија за талентирани ученици и студенти. Во мај 2005 година јавно го одбранила нејзиниот магистерски труд под наслов „Квазигрупни трансформации и нивни примени“ под менторство на проф. д-р Смиле Марковски, а во ноември 2010 јавно ја одбранила и нејзината докторска теза под наслов “Квазигрупно процесирани низи, нивна Булова презентација и примена во криптогафијата и теоријата на кодирање” исто така под менторство на проф. д-р Смиле Марковски и се здобила со звањето доктор на информатички науки. Од април 2000 година е вработена како стручен соработник на Институтот за информатика при ПМФ. Во февруари 2011 година е избрана за доцент на Институтот за Информатика. Во текот на својот ангажман на Институтот за информатика, држела вежби по 14 предмети. Има подготвено електронски учебни материјали за повеќе предмети. Од странските јазици зборува и пишува англиски јазик, разбира германски и руски јазик. Научното поле на интерес е криптографијата, посебно квазигрупните трансформации и нивната примена во криптографијата. До сега има објавено 19 научни труда и има учествувано со свои излагања на преку 30 конференции, симпозиуми, конгреси, семинари, школи и работилници. Била еден од предавачите на школата “Algebraic Structures and their Applications in Codding theory and Cryptography” во Охрид, 2009 во рамки на DAAD проект. Има неколку академски престои: во Johannes Kepler University, во Линц, Австрија, во Бугарската Академија на науките, во Софија, Бугарија, во South Bank University во Лондон, Велика Британија и др. Била член во 8 домашни и меѓународни проекти. Покрај активната дејност во наставната и научно-истражувачката работа, има и голема стручно-професионална дејност. Има објавено 9 стручни труда, два технички извештаи и два постера за конференции. Ја има преведено и рецензирано книгата од областа на криптографијата “Практична криптографија”. Член е на Здружението ICT-ACT, на Здружението на Информатичарите на Македонија и на центарот за Дигитизација на Националното Наследство на Македонија на Институтот за информатика при ПМФ. Била член во организација на три меѓународни конференции и е уредник на проширената книга апстракти на една меѓународна конференција. 

Рецензија - ЛИНК.
Одлука за избор - ЛИНК

Роден на 1 март 1978 година во Скопје, каде што ги завршил основното и средното образование со одличен успех. Во текот на школувањето учествувал и освојувал награди на повеќе натпревари, меѓу кои на Државниот натпревар по информатика за средношколци во 1996 година освоил I награда, а учествувал на 8. Интернационална олимпијада по информатика и на 4. Балканска олимпијада по информатика, како претставник од Р. Македонија. При завршувањето на средното училиште бил прогласен за првенец на генерацијата. Истовремено, со успех ги завршил курсевите по англиски јазик во Центарот за странски јазици во Скопје и се стекнал со диплома од Универзитетот во Кембриџ за положен прв сертификат по англиски јазик. На студиите по информатика на ПМФ се запишал во академската 1996/97 година Дипломирал во 2000 година како најдобар студент на Факултетот и на Универзитетот, со среден успех 9.91. Во текот на студиите добил многубројни признанија за учество на меѓународни студентски натпревари за програмирање, организирани од здружението ACM, на кои во 1999 година го освоил второто место, како член на тимот на студенти по информатика при ИИ, и се пласирал за 24. ACM интернационално студентско светско финале, кое се одржа во 2000 година во Орландо, САД. По третата година на студииите, престојувал во лабораториите на компанијата Филипс во Ајндховен, Холандија, каде што работел на проучување на техниките за кодирање кај мултикаст-протоколите. Од октомври 2000 до март 2001 година работел како демонстратор на ИИ при ПМФ, а потоа бил избран за помлад асистент. Во 2001 година запишал постдипломски студии по информатика при ПМФ, кои ги завршил во 2004 година, со одбрана на магистерскиот труд под наслов “Комуникации кај грид-технологијата”, под менторство на проф. д-р Марјан Гушев. Во 2010 година со одбрана на докторската дисертација под наслов "Моделирање и верификација на грид процесни текови" се здобил со звањето доктор по информатички науки, по што во 2011 е избран за доцент. Изведува настава по предметите: мрежни и дистрибуирани оперативни системи, системски софтвер, вовед во ИТ. За студентите на ИИ изведувал вежби по предметите: вовед во информатиката 1, вовед во информатиката 2, конечна математика, нумеричко сметање со програмирање, програмски јазици, архитектура на компјутерските системи, алгоритми и автомати, структури на податоци, формални јазици и автомати, оперативни системи, паралелно и дистрибуирано процесирање, мрежни оперативни системи, теорија на програмирањето и системски софтвер. Раководител е на меѓународниот проект од FP7 програмата за Европската грид иницијатива. Бил соработник во 15 меѓународни проекти од областа на информатиката и унапредувањето на наставата по информатика. Значителен удел има во проектите SEE-GRID, SEE-GRID-2, SEE-GRID-SCI, како главно лице за техничките активности во имплементацијата на грид-технологијата во Република Македонија. Учествувал во преку 20 работилници како предавач и има остварено 10 кратки посети на универзитети и летни школи. Научниот интерес му претставуаат областите: грид пресметување, пресметување со високи перформанси, паралелно и дистрибуирано процесирање, генетски алгоритми, од кои има објавено 18 научни трудови на меѓународни конференции и 1 научен труд во меѓународно списание.

Рецензија - ЛИНК.
Одлука за избор - ЛИНК

Роден е 1976 година во Скопје. Во 2003-та година дипломира на Електротехничкиот факултет во Скопје. Магистерските студии ги продолжува на Бостон Универзитетот во Бостон, Масачусетс. Магистерската работа „Имплементирање на Лексикографската конструкција“ ја одбранил во 2006-та година. Во 2008-ма година е вработен како помлад асистент на Институтот за Информатика при Природно-математичкиот факултет. Во 2010 ја одбранил докторската дисертација „Прилог кон некои особини на добрите кодови“ на Природно-математичкиот факултет во Скопје. Има остварено два студиски престои: во 2001-ва година на Институтот за Нелинеарни науки, при Универзитетот во Калифоринја во Сан Диего и во 2010 година во Опатија, Р. Хрватска на NATO институтот за напредни студии. Научен интерес на д-р Дејан Спасов се теорија за кодирање и компјутерски мрежи. Во досегашната научно-истражувачка работа има учествувано на 6 конференции во земјата и странство, при што има објавено 8 научни труда и една статија во меѓународно научно списание. Има учествувано на три меѓународни проекти. 

Рецензија - ЛИНК.
Одлука за избор - ЛИНК

Роден е 1981 година во Кратово. Дипломирал на Електротехничкиот факултет во Скопје во 2005 година. Магистрирал на Факултетот за електротехника и информациски технологии во Скопје во 2008 година. На Институтот за компјутерска техника и информатика при Електротехничкиот факултет во Скопје почнал да работи од 2005 година прво како демонстратор, во 2007 година e избран во звањето помлад асистент, a во 2009 во асистент. Неговите наставни обврски опфаќаат изведување вежби по предмети од областа на структурирано програмирање, објектно ориентирано програмирање, интернет програмирање, кориснички интерфејси, визуелизација и виртуелна реалност. Во рамките на досегашната научно-истражувачка работа учествувал во изработката на повеќе публикувани научно-истражувачки трудови и три поглавја во книги. Полињата на научно-истражувачки интерес вклучуваат обработка на слики и видео, извлекување на визуелни карактеристики за сликите, содржинско базирано пребарување на мултимедијални податоци, машинско учење.

Рецензија - ЛИНК.
Одлука за избор - ЛИНК

Роден е 1984 година во Велес. Дипломирал на Факултетот за електротехника и информациски технологии во Скопје во 2007 година, на насоката компјутерска техника, информатика и автоматика со просек 10.00, како најдобар во својата генерација. Добитник е на наградата „Златник“ од Универзитетот „Свети Кирил и Методиј“ и „Златен прстен“ од организацијата на инженерите на Македонија. Во 2009-та година ја одбранил магистерската тема и се стекнал со научното звање магистер на електротехнички науки област компјутерска техника и информатика. Докторската дисертација ја одбранил во 2012-та година под менторство на проф. Дејан Ѓорѓевиќ и коменторство на проф. Сашо Џероски на Факултетот за информатички науки и компјутерско инженерство. Своето прво работно искуство го стекнал во Друштвото за компјутерски услуги „Netcetera“ - Скопје, во одделот за софтвер и веб развој. Во рамките на досегашната научно-истражувачка работа, учествувал во изработката на повеќе научни и стручни трудови објавени на домашни и меѓународни конференции и списанија. Полињата на неговиот научно-истражувачки интерес вклучуваат: препознавање на облици, машинско учење и софтверско инженерство.

Рецензија - ЛИНК.
Одлука за избор - ЛИНК

Роден е 1981 година во Скопје. Дипломирал на Електротехничкиот факултет во Скопје во 2005 година. Магистрирал на Факултетот за електротехника и информациски технологии во 2008 година. Во моментов работи на докторската теза од областа на ранливост на комплексни мрежи. Веднаш по дипломирањето започнал со работа на Институтот за компјутерска техника и информатика при Електротехничкиот факултет во Скопје како демонстратор. Од крајот на 2007 година работи како помлад асистент по предметите од областа компјутерска техника и информатика. Во текот на неговиот работен ангажман дава значаен придонес во осмислувањето, креирањето и организацијата на аудиториски и лабораториски вежби. Активно учествувал во истражувања од областа на комплексните и компјутерските мрежи и има објавено 10 научни трудови на меѓународни и домашни конференции и списанија. Учествувал во изработката на 4 книги, како и во поголем број на научно истражувачки и апликативни проекти. Области на негов научно-истражувачки интерес се комплексни мрежи, компјутерски мрежи, безжични мобилни ад хок мрежи, апликативен софтвер и веб технологии, дизајнирање на системи на чип.

Рецензија - ЛИНК.
Одлука за избор - ЛИНК

Родена е 1963 година во Скопје. Дипломирала на Електротехничкиот факултет во Скопје (1986), магистрирала на Електротехничкиот факултет во Загреб (1993) и докторирала на универзитетот „Џорџ Вашингтон“, САД (2004). Во 1990 година е вработена на Институтот за компјутерска техника и информатика при Електротехничкиот факултет во Скопје како помлад асистент. Звањата асистент и доцент ги стекнала во 1993 и 2005 година, соодветно. За време на докторските студии во САД (1997-2003) и во периодот од 2006 до денес, предавала и учествувала во истражувачката дејност на универзитетот „Џорџ Вашингтон“, САД. Нејзината научно-истражувачката работа е од областа на кориснички интерфејси со посебен интерес за интелигентни интерфејси базирани на агенти, репрезентација на контекст во интелигентни системи и мултимедиски системи. Автор/коавтор е на околу четириесетина научни трудови публикувани во зборници од меѓународни конференции, едитирани книги и меѓу народни научни списанија. Учествувала во десетина научно-истражувачки проекти во Македонија и САД. Нејзините актуелни истражувања се фокусирани на интелигентни системи за поддршка на интеракцијата човек-компјутер, посебно наменети за системи во кои сигурноста и безбедноста на корисниците и опремата се од критична важност.

Рецензија - ЛИНК.
Одлука за избор - ЛИНК

Родена е 1968 година во Прилеп. Во 1992 год. завршила Електро-технички факултет на Универзитетот “Св. Кирил и Методиј” во Скопје, насока Компјутерска техника и автоматика. Во 2005 година се запишува на последипломски студии на Економскиот факултет на Универзитетот “Св. Кирил и Методиј” во Скопје, на насоката МБА менаџмент, и магистрира во 2009 година со темата „Информационата технологија во стратегијата на претпријатието“. Во јуни 2011 година на Економскиот факултет на Универзитетот “Св. Кирил и Методиј” во Скопје ја одбранила докторската дисертација под наслов „Стратегиски модели на е-Управување“. Во 2009 година е избрана за асистент на Универзитетот Американ колеџ во Скопје, на Факултетот за деловна економија и организациони науки, а во 2011 година е избрана за асистент на Факултетот за информатички науки и компјутерско инженерство на Универзитетот “Св. Кирил и Методиј” во Скопје. Има долгодишно искуство во ИКТ секторот во Македонија. Работела во ИКТ одделите на повеќе претпријатија од приватниот сектор, на различни позиции, како програмер, бизнис аналитичар, ИТ администратор, водач на  тим за развој на апликативен софтвер, и како Директор на сектор за информатика во осигурителна компанија. Била ангажирана како сениор ИТ експерт од страна на Европската агенција за реконструкција.Посетувала бројни обуки главно од областа на менаџмент и информациски технологии. Има напишано неколку стручни и научни трудови. Нејзино поле на интерес се информациски системи од аспект на нивната примена, менаџмент и стратегии на информациските системи во компаниите од приватниот сектор и во јавниот сектор, како и примена на информациски и комуникациски технологии за развој.

Рецензија - ЛИНК.
Одлука за избор - ЛИНК

д-р Весна Димитриевска Ристовска е родена 1968 год. во Скопје. Основно и средно образование завршила во Скопје, со континуиран одличен успех.

Дипломирала на Природно-математичкиот Факултет во Скопје на студиите по информатика со просечна оценка на студиите 9.43, со одбрана на дипломска работа со наслов “Паралелизација на секвенцијална програма“. Во јануари 2007 година го одбранила магистерскиот труд под наслов “Квантитативни мерки за рамномерна распределба на низи“, со што се здобила со звањето магистер по информатички науки. Во 2013 година на ФИНКИ ја одбранила докторската дисертација на тема ,,Квази Монте карло интегрирање во тежински Хилбертови простори и врска со дијафонијата – математички модели и софтверска реализација”.

Во рамките на наставно-образовната дејност на УКИМ, Факултет за информатички науки и компјутерско инженерство,  д-р Весна Димитриевска Ристовска изведувала или изведува настава по предметите: Калкулус 1, Калкулус 2, Калкулус 3, Математика 1, Математика 2 и Дискретна математика 1 на прв циклус студии, на предметите: Оптимизација и Калкулус 3 на втор циклус студии.

Како асистент на ИИ, при ПМФ изведувала аудиториумски и лабораториски вежби по предметите: калкулус 1, калкулус 2, калкулус 3, основи на програмирање, бази податоци, основи на оперативни системи, аналитичка геометрија, нумеричко сметање, вектори и матрици, нумерички методи, диференцијално сметање, вовед во информатиката 1, функции од повеќе променливи, информатика, математичка анализа, теорија на информации, програмирање и програмирање на сметачки машини.

Во последните 5 години д-р Весна Димитриевска Ристовска има објавено неколку научни трудови од областите математика, информатика и компјутерска техника и информатика.

Рецензија - ЛИНК.
Одлука за избор - ЛИНК

д-р Андреја Наумоски дипломирал и магистрирал  во 2006 и 2008 година, соодветно,додека во јули 2012 успешно ја одбранил докторската теза на Факултетот за информатички науки и компјутерско инженерство во Скопје. Од 2006 година, работи на неколку меѓународни проекти на Факултетот како истражувачки асистент, додека во 2009 година е ангажиран како демонстратор при Факултетот за електротехника и информациски технологии во Скопје. На Факултетот за информатички науки и компјутерско инженерство во Скопје во 2011 година е ангажиран како демонстратор, додека во јануари 2014 е избран во звањето насловен доцент. Наставните обврски му опфаќаат изведување предавања и аудиториски вежби по неколку предмети. Автор и коавтор е на повеќе од четириеесет научни трудови на меѓународни  конференции и престижни странски списанија, како и меѓународни списанија со фактор на влијание. Учествувал во 3 меѓународни проекти финансирани од Темпус и FP6 програмата, како и на билатерални проекти. Полиња на научно - истражувачки интерес му се машинско учење и податочно рударење на еколошки податоци, моделирање и предикција на динамички процеси, фази логика и фази машински алгоритми, како и анализа на временски серии.

Рецензија - ЛИНК.
Одлука за избор - ЛИНК