Милан Тодоровиќ е роден во 2001 година во Куманово. Основно и средно образование завршил во Куманово со континуиран одличен успех, за време на кои учествувал на повеќе регионални, државни натпревари и национални олимпијади во различни области и имал освоено повеќе награди и признанија. На додипломски студии се запишал во 2020 година на Факултетот за информатички науки и компјутерско инженерство, насока Софтверско инженерство и информациски системи. Во текот на студиите вршел практична работа во компанијата „Интелигента“. Во периодот октомври 2022 - октомври 2024 година бил ангажиран како лаборант на Факултетот за информатички науки и компјутерско инженерство, каде изведувал лабораториски вежби по предметите Структурно програмирање, Објектно ориентирано програмирање, Веб програмирање, Бази на податоци, Интегрирани системи и Оперативни системи. Во јули 2024 година дипломирал со дипломскиот труд „Анализа на поврзаноста на цените на храната во балканските земји“ и просечна оцена 9,88. Истата година се запишал на постдипломски студии на Факултетот за информатички науки и компјутерско инженерство, на насока Софтверско инженерство. Во ноември 2024 година е избран за демонстратор на Факултетот за информатички науки и компјутерско инженерство. Области на негов научно-истражувачки интерес се софтверско инженерство, апликативен софтвер, бази и складишта на податоци, алгоритми и податочни структури.

Димитар Китановски е роден во 1998 година во Битола. Основно образование завршил во ОУ „Гоце Делчев“ во Ресен, додека средно образование завршил во СОТУ „Ѓорѓи Наумов“ во Битола со континуиран одличен успех. За време на школувањето, учествувал на неколку натпревари и има освоено повеќе награди и признанија. Покрај школувањето има учествувано и на неколку практични настави во ИТ компании преку кои го надградувал своето знаење.

На Факултетот за информатички науки и компјутерско инженерство се запишал во 2016 година. Во текот на последните две години од студиите работел како соработник на Факултетот за информатички науки и компјутерско инженерство. Дипломирал во 2020 година со дипломски труд на тема „Систем за само-евалуација наменет за високо образование“, под менторство на проф. д-р Иван Чорбев.  Магистрирал во 2022 година на ФИНКИ, на насоката Управување во информатички технологии и истата учебна година, 2022/23 се запишува на докторски студии на ФИНКИ, на насоката Компјутерски науки и инженерство. 

Во ноември 2020 година ја започнува својата академска кариера како вработен на Факултетот за информатички науки и компјутерско инженерство, избран во наставно-научно звање демонстратор, при што изведува аудиториски и лабораториски вежби. Во 2023 година е избран во наставно-научно звање асистент.

Полиња на негов научно-истражувачи интерес се: инженерство на податоци, бази и складишта на податоци, машинско учење, вештачка интелигенција, наука базирана на податоци и софтверско инженерство.

Рецензија - ЛИНК.
Одлука за избор - ЛИНК

Ненад Анчев е роден 1990 година во Штип. Основно образование завршува во ОУ Гоце Делчев како првенец на генерацијата. Средното образование го завршува во Гимназија Славчо Стојменски, со бројни учества и награди на натпревари по информатика, математика и физика, меѓу кои и учество на меѓународната олимпијада по информатика во Египет во 2008 година. Дипломира на ФИНКИ во 2013 на насока компјутерски архитектури и мрежи со просек 9,72 на тема „Анализа на техники за оптимизација и паралелизација на алгоритам за множење на матрици“. Во учебната 2012/13 година помага при изведување на лабораториските вежби на ФИНКИ по предметите концепти за развој на софтвер и архитектура на компјутери. Дел од магистерските студии ги следи на универзитетот RWTH Aachen во Германија на програмата за симулациски науки, како стипендист на DAAD. Таму во 2014 и 2015 работи како помлад истражувачки асистент на Julich Aachen Research Alliance во одделот за пресметување со високи перформанси. Во периодот од 2016-2018 работи во Сорсикс во тимот за податочни науки и анализа на податоци. Од 2019 е ангажиран на ФИНКИ како демонстратор за изведување на аудиториски и лабораториски вежби по неколку предмети. Магистерската теза ја работи на тема „Адаптивни модели за симулација на аерозагадување“. Ненад покажува особен интерес во областите на пресметување со високи перформанси, алгоритми, моделирање и симулации, како и областа на податочни науки.

Рецензија - ЛИНК.
Одлука за избор - ЛИНК

Петар Секулоски е роден во 1994 година во Струга. Во 2013 година се запишал на Факултетот за информатички науки и компјутерско инженерство, насока компјутерски науки и инженерство. Дипломирал во 2017 година при што се стекнал со титулата дипломиран инженер по информатички науки и компјутерско инженерство, насока компјутерски науки и инженерство. Студент е на постдипломските студии на Факултетот за информатички науки и компјутерско инженерство од 2017, на насокота Компјутерски науки. На Факултетот за информатички науки и компјутерско инженерство најпрво бил ангажиран како лаборант, а од октомври 2018 година како демонстратор. Неговиот ангажман претежно ги опфаќа математичките предмети. Одржува аудиториски вежби по Калкулус, Калкулус 1, Калкулус 2, Дискретна математика и Дискретни структури 1, како и лабораториски вежби по овие предмети. Исто така одржува/одржувал лабораториски вежби по предметите: Веројатност и статстика, Инженерска математика, Калкулус 3, Структурно програмирање, Објектно-ориентирано програмирање, Географски информациони системи и Компјутерски компоненти. Области на негов научно-инстражувачки интерес се тополошка анализа на податоци, пресметковна топологија, машинско учење како и примена на методи од алгебрска топологија во областите од компјутерски науки.

Рецензија - ЛИНК.
Одлука за избор - ЛИНК

Ана Тодоровска е родена во 1998 година во Битола. Основното и средното образование ги завршила во Битола со континуиран одличен успех.
Во 2016 година се запишала на додипломски студии на Факултетот за информатички науки и компјутерско инженерство (ФИНКИ), на насоката Компјутерски науки и инженерство - англиски јазик.
Во текот на студиите изведувала практична работа во компаниите „Sorsix“ и „Idox Health“, а во 2019 година била ангажирана како лаборант на ФИНКИ.

Дипломирала во 2020 година со дипломскиот труд „Платформа за споделување и изнајмување на облека“, под менторство на проф. д-р Димитар Трајанов.
Во 2022 година магистрирала со магистерска теза на тема „Моделирање на поврзаноста помеѓу дигиталните валути и класичните економски индикатори“, исто така под менторство на проф. д-р Димитар Трајанов.
Истата година се запишала на докторски студии на ФИНКИ, на насоката Компјутерски науки и инженерство.

Од декември 2020 година е вработена на Факултетот за информатички науки и компјутерско инженерство. Области на нејзин научно-истражувачки интерес се машинско учење, наука базирана на податоци, обработка на природни јазици и работа со големи податоци.

Рецензија - ЛИНК.
Одлука за избор - ЛИНК

Јована Добрева е родена во 1998 година во Скопје, каде завршува средно образование со одличен успех во гимназијата ,,Раде Јовчевски - Корчагин”.

Своето високо образование го започнува во 2016 година на Факултетот за информатички науки и компјутерско инженерство на насоката Информатика и компјутерско инженерство. Во четвртата година од студиите (2019 година) е ангажирана како лаборант на факултетот. Непосредно потоа во 2020 година дипломира со просечна оценка 9.70 со дипломскиот труд  ,,Платформа за извлекување на знаење поврзано со лекови од медицински текстови” под менторство на проф. д-р Димитар Трајанов.

Своето образование го продолжува во 2020 година со запишување на  постдипломски студии на насоката Управување во информатички технологии. Истата година во декември е вработена на ФИНКИ, каде одржува аудиториски и лабораториски вежби.

Полињата на научно-истражувачки интерес и се Data Science, Machine Learning, Natural Language Processing, Big Data, Computer and Information Security.

Јана Кузманова е родена во 1994 година во Скопје. Основно и средно образование завршила во Скопје, а во 2013 година се запишува на додипломски студии на Техничкиот Универзитет Минхен. Дипломирала на 19 јули 2017 година со дипломскиот труд „Efficient Formal Arithmetic in  Isabelle/HOL” („Ефикасна формална аритметика во Isabelle/HOL”) под менторство на проф. д-р. Тобиас Нипко.

Научни полиња од особен интерес за кандидатот се машинското учење, податочно рударство и неговата примена во науките, пресметување со високи перформанси и обработката на природни јазици.

Рецензија - ЛИНК.
Одлука за избор - ЛИНК