Роден e 1971 година во Охрид. Основно и средно училиште завршил во Охрид. Во 1990 година се запишал на Военотехничкиот факултет во Загреб, каде што ја завршил првата година на студиите. Од академската 1991/92 година студиите ги продолжил во Скопје, на ИИ при ПМФ. Студиите ги завршил во 1996 година, со што се стекнал со звањето дипломиран инженер по информатика. По завршувањето на студиите работел како надворешен соработник - програмер во неколку софтверски куќи на развојот на поголеми информациони системи. Во 1997 година го отслужил воениот рок. Во академската 1997/98 година се запишал на постдипломски студии на ИИ, кои ги завршил во 2002 година, со одбрана на магистерскиот труд “Преименување на регистри”, под менторство на проф. д-р Марјан Гушев. Во 2009 година докторирал на тема "Процесни текови кај грид пресметувањата – управување, извршување и распределување” под менторство на Проф. Д–р Маргита Кон–Поповска. Во 1998 година бил избран за стручен соработник, во 2000 година за помлад асистент, а во 2003 година за асистент во Заводот за програмско инженерство при ИИ. Во 2009 година избран е за доцент на Институтот за информатика. Од 1999 до 2003 година ја извршувал функцијата в.д. раководител на Компјутерскиот центар при ИИ, а во 2005 година е избран за раководител на Компјутеркиот центар на ПМФ. Во 2009 повторно е избран за раководител на Компјутерскиот центар на ИИ, функција што и денес ја извршува.

Работи и како инструктор во регионалната CISCO-академија на Институтот за информатика. Држи настава по предметите: Структури на податоци и алгоритми, квалитет на софтвер и тестирање, микропроцесори и микрокомпјутери, проектирање на компјутерски мрежи, безжични мрежи, современи компјутерски системи, напредни алгоритми, грид и научно процесирање, интеграција на системи, софтверско инженерство за критични системи и др. Држел вежби по следниве предмети: архитектура на компјутерите, микропроцесори и микрокомпјутери, програмски јазици, структури на податоци, проектирање компјутерски мрежи, компјутерски мрежи, интернет, интернет-апликации, интерактивни апликации, учење со компјутери, современи компјутерски системи, бази на податоци за студентите по информатика, вовед во информатиката за студентите по географија, вовед во информатиката за студентите од Факултетот за земјоделски науки и храна и од Филозофскиот факултет. Во фокусот на неговите истражувања се инфраструктурите за колаборативно пресметување и истражување, а пред сè грид и системите за пресметување со високи перформанси. Негова цел е овие системи да се доближат кон сите потенцијални корисници, пред сè кон истражувачките заедници, за да може во целост да се искористи огромниот потенцијал што тие го нудат. Истражувал и во областите компјутерските архитектури и мрежи, софтверското инженерство, интернет-технологиите и електронското учење. Учествувал во реализацијата на преку 25 меѓународни проекти, финансирани од ТЕМПУС, ФАРЕ, ДААД и ФП програмата, а поврзани со развојот на информатичката инфраструктура и со информатичкото образование. Во моментов е координатор за Македонија на еден ФП7 проект, поврзан со процесирање со високи перформанси (High Performance Computing) HP-SEE. Автор е на преку 35 научни и стручни трудови објавени во меѓународни списанија и зборници од конференции, а одржал и над 25 презентации на научни и стручни собири и работилници. Член е на неколку здруженија од областа на иформатиката (IEEE, ICT-ACT).

Рецензија - ЛИНК.
Одлука за избор - ЛИНК

Роден е 1980 година во Охрид. Дипломирал и магистрирал на Електротехничкиот факултет во Скопје во 2004 и 2006 година, соодветно. Докторирал на Факултетот за електротехника и информациски технологии во Скопје во 2009 година. Во текот на факултетското образование бил континуирано наградуван за успешните студии. Како најдобар студент во генерацијата е наградуван од Факултетот, универзитетот “Св. Кирил и Методиј” и други организации и фондации, меѓу кои Организацијата на инженерите на Македонија, од која ја добил наградата златен прстен. Своето прво работно искуство го стекнал во АД “Македонски телекомуникации” - МТнет, во одделот за софтвер и веб развој, во периодот 2003-2005 година. На Институтот за компјутерска техника и информатика при Електротехничкиот факултет во Скопје почнал да работи од 2005 година, прво како демонстратор и потоа од 2006 година и како помлад асистент. Звањето асистент го добил во 2008 година, а во 2009 година е избран за доцент. Неговите наставни обврски опфаќале настава по предмети од областа на структурирано програмирање, објектно-ориентирано програмирање, програмски методологии, веб дизајн, компјутерска графика, компјутерска анимација, итн.
Во рамките на досегашната научно-истражувачка работа до 2011 година учествувал во изработката на повеќе од 35 научно-истражувачки трудови публикувани во книги, списанија и реценирани зборници од конференции. Полињата на негов научно-истражувачки интерес вклучуваат комбинаторна оптимизација, евристички алгоритми, програмирање со ограничувања, технологии за веб програмирање, тестирање на софтвер, примена на информатиката во медицината и телемедицински системи, медицински експертски системи, екстракција на знаење, машинско учење. Автор е на еден универзитетски учебник. Рецензент е на еден универзитетски учебник.
Како IT консултант бил ангажиран при студии и развој на повеќе апликативни решенија за Enterprise Resource Planning (ERP) системи, универзитетски информациони системи, веб системи за менаџирање со содржини (CMS), Document Management Systems - DMS, системи за онлајн плаќање, електронска евиденција на присуство, банкарски апликации, нафтена индустрија. Учествувал како IT консултант во проекти финансирани од Европската унија (FP6, FP7, TEMPUS), невладини организации (NDI).

Рецензија - ЛИНК.
Одлука за избор - ЛИНК

Ласко Баснарков е роден во Кавадарци, во 1977 година. Димпломира на Електротехничкиот факултет во Скопје во 2000 година, на насоката електроника и телекомуникации. Магистрира во 2005, а докторира во 2009 година на Природно-математичкиот факултет во Скопје, во областа теориска физика. Работи како асистент по физика на Електротехничкиот факултет (подоцна Факултет за електротехника и информациски технологии) од 2002 година. Од септември 2011 година е вработен на Факултетот за информатички науки и компјутерско инженерство, како доцент по физика.
Централно место во научниот интерес на Ласко Баснарков завземаат нелинеарната динамика и статистичката физика. Подетално се занимавал со проучување на детерминистичка и стохастичка дифузија и синхронизација на фазни осцилатори. Денес неговите истражувања се насочени кон употребата на синхронизацијата за моделирање на климата и моделирање на финансиски временски серии. Главни алатки кои ги користи во своите истражувања се математичка анализа и компјутерски симулации.

Рецензија - ЛИНК.
Одлука за избор - ЛИНК

Роден е 1976 година во Скопје. Основно и средно образование оформил во Скопје и бил добитник на повеќе награди и признанија на републички и на сојузни натпревари по математика и физика. Во 1995 година се запишал на Електротехничкиот факултет во Скопје, отсек компјутерска техника, информатика и автоматика. Во текот на студиите 5 пати бил наградуван за одличен успех во студирањето. Дипломирал во 2000 година,со одбрана на дипломската работа под наслов “Публикување преку WEB“ со среден успех 9,36. Постдипломски студии по информатика запишал на ПМФ во Скопје. Магистерскиот труд со наслов “Електронско тестирање”, изработен под менторство на проф. д-р Марјан Гушев, го одбранил во 2003 година По дипломирањето бил избран за помлад асистент на ИИ, а по магистрирањето, во 2004 година, за асистент. Докторира во 2010 година со докторската дисертација со наслов „Сервис-ориентирана архитектура во е-тестирање“ и во истата година е избран за доцент. Изведувал/изведува вежби по предметите: вовед во информатиката I и II, интернет, интернет-технологии, архитектура на компјутерите, компјутерски мрежи, проектирање на компјутерски мрежи, мултимедија, компјутерски апликации, дизајнирање на образовен софтвер, компјутерски системи во наставата - за студентите по информатика и вовед во информатиката - за студентите по географија и математика-физика. Главно подрачје на научен интерес му се електтронската проверка на знаењето, електронското учење, веб-апликациите, сервис-ориентираната архитектура. Објавил 2 научни трудa во меѓународни списаниja од областа на електронското учење и електронска влада и 22 научни труда во зборници од домашни и од меѓународни конференции. Учесник и раковдител е на неколку проекти од областа на електронскиот бизнис и електронското образование. Во 2003 година добил меѓународна стипендија од Светската организација на научници со седиште во Швајцарија за реализација на проектот “Компјутерски помогнато учење, модели, концепти и апликации за далечинско учење”. Во 2005 година бил член на работната група за изработка на Националната стратегија и акциониот план за развој на информатичко општество. Членува во IEEE, Светската федерација на научници и во ETAI (Друштво за електроника, телекомуникации, автоматика и информатика на Македонија).

Рецензија - ЛИНК.
Одлука за избор - ЛИНК

Роденa е 1974 година во Скопје. Основното и средното образование го завршила во Скопје, со континуиран одличен успех. На студиите по информатика на Институтот за Информатика при ПМФ, применета насока дипломирала во јуни 1997 со дипломска работа од областа криптографијата под наслов “Софтверска реализација на безбедна комуникација со C модули под UNIX” под менторство на проф. д-р Смиле Марковски, редовен професор на ПМФ. Во текот на школувањето примала стипендија за талентирани ученици и студенти. Во мај 2005 година јавно го одбранила нејзиниот магистерски труд под наслов „Квазигрупни трансформации и нивни примени“ под менторство на проф. д-р Смиле Марковски, а во ноември 2010 јавно ја одбранила и нејзината докторска теза под наслов “Квазигрупно процесирани низи, нивна Булова презентација и примена во криптогафијата и теоријата на кодирање” исто така под менторство на проф. д-р Смиле Марковски и се здобила со звањето доктор на информатички науки. Од април 2000 година е вработена како стручен соработник на Институтот за информатика при ПМФ. Во февруари 2011 година е избрана за доцент на Институтот за Информатика. Во текот на својот ангажман на Институтот за информатика, држела вежби по 14 предмети. Има подготвено електронски учебни материјали за повеќе предмети. Од странските јазици зборува и пишува англиски јазик, разбира германски и руски јазик. Научното поле на интерес е криптографијата, посебно квазигрупните трансформации и нивната примена во криптографијата. До сега има објавено 19 научни труда и има учествувано со свои излагања на преку 30 конференции, симпозиуми, конгреси, семинари, школи и работилници. Била еден од предавачите на школата “Algebraic Structures and their Applications in Codding theory and Cryptography” во Охрид, 2009 во рамки на DAAD проект. Има неколку академски престои: во Johannes Kepler University, во Линц, Австрија, во Бугарската Академија на науките, во Софија, Бугарија, во South Bank University во Лондон, Велика Британија и др. Била член во 8 домашни и меѓународни проекти. Покрај активната дејност во наставната и научно-истражувачката работа, има и голема стручно-професионална дејност. Има објавено 9 стручни труда, два технички извештаи и два постера за конференции. Ја има преведено и рецензирано книгата од областа на криптографијата “Практична криптографија”. Член е на Здружението ICT-ACT, на Здружението на Информатичарите на Македонија и на центарот за Дигитизација на Националното Наследство на Македонија на Институтот за информатика при ПМФ. Била член во организација на три меѓународни конференции и е уредник на проширената книга апстракти на една меѓународна конференција. 

Рецензија - ЛИНК.
Одлука за избор - ЛИНК

Роден на 1 март 1978 година во Скопје, каде што ги завршил основното и средното образование со одличен успех. Во текот на школувањето учествувал и освојувал награди на повеќе натпревари, меѓу кои на Државниот натпревар по информатика за средношколци во 1996 година освоил I награда, а учествувал на 8. Интернационална олимпијада по информатика и на 4. Балканска олимпијада по информатика, како претставник од Р. Македонија. При завршувањето на средното училиште бил прогласен за првенец на генерацијата. Истовремено, со успех ги завршил курсевите по англиски јазик во Центарот за странски јазици во Скопје и се стекнал со диплома од Универзитетот во Кембриџ за положен прв сертификат по англиски јазик. На студиите по информатика на ПМФ се запишал во академската 1996/97 година Дипломирал во 2000 година како најдобар студент на Факултетот и на Универзитетот, со среден успех 9.91. Во текот на студиите добил многубројни признанија за учество на меѓународни студентски натпревари за програмирање, организирани од здружението ACM, на кои во 1999 година го освоил второто место, како член на тимот на студенти по информатика при ИИ, и се пласирал за 24. ACM интернационално студентско светско финале, кое се одржа во 2000 година во Орландо, САД. По третата година на студииите, престојувал во лабораториите на компанијата Филипс во Ајндховен, Холандија, каде што работел на проучување на техниките за кодирање кај мултикаст-протоколите. Од октомври 2000 до март 2001 година работел како демонстратор на ИИ при ПМФ, а потоа бил избран за помлад асистент. Во 2001 година запишал постдипломски студии по информатика при ПМФ, кои ги завршил во 2004 година, со одбрана на магистерскиот труд под наслов “Комуникации кај грид-технологијата”, под менторство на проф. д-р Марјан Гушев. Во 2010 година со одбрана на докторската дисертација под наслов "Моделирање и верификација на грид процесни текови" се здобил со звањето доктор по информатички науки, по што во 2011 е избран за доцент. Изведува настава по предметите: мрежни и дистрибуирани оперативни системи, системски софтвер, вовед во ИТ. За студентите на ИИ изведувал вежби по предметите: вовед во информатиката 1, вовед во информатиката 2, конечна математика, нумеричко сметање со програмирање, програмски јазици, архитектура на компјутерските системи, алгоритми и автомати, структури на податоци, формални јазици и автомати, оперативни системи, паралелно и дистрибуирано процесирање, мрежни оперативни системи, теорија на програмирањето и системски софтвер. Раководител е на меѓународниот проект од FP7 програмата за Европската грид иницијатива. Бил соработник во 15 меѓународни проекти од областа на информатиката и унапредувањето на наставата по информатика. Значителен удел има во проектите SEE-GRID, SEE-GRID-2, SEE-GRID-SCI, како главно лице за техничките активности во имплементацијата на грид-технологијата во Република Македонија. Учествувал во преку 20 работилници како предавач и има остварено 10 кратки посети на универзитети и летни школи. Научниот интерес му претставуаат областите: грид пресметување, пресметување со високи перформанси, паралелно и дистрибуирано процесирање, генетски алгоритми, од кои има објавено 18 научни трудови на меѓународни конференции и 1 научен труд во меѓународно списание.

Рецензија - ЛИНК.
Одлука за избор - ЛИНК

Роден е 1976 година во Скопје. Во 2003-та година дипломира на Електротехничкиот факултет во Скопје. Магистерските студии ги продолжува на Бостон Универзитетот во Бостон, Масачусетс. Магистерската работа „Имплементирање на Лексикографската конструкција“ ја одбранил во 2006-та година. Во 2008-ма година е вработен како помлад асистент на Институтот за Информатика при Природно-математичкиот факултет. Во 2010 ја одбранил докторската дисертација „Прилог кон некои особини на добрите кодови“ на Природно-математичкиот факултет во Скопје. Има остварено два студиски престои: во 2001-ва година на Институтот за Нелинеарни науки, при Универзитетот во Калифоринја во Сан Диего и во 2010 година во Опатија, Р. Хрватска на NATO институтот за напредни студии. Научен интерес на д-р Дејан Спасов се теорија за кодирање и компјутерски мрежи. Во досегашната научно-истражувачка работа има учествувано на 6 конференции во земјата и странство, при што има објавено 8 научни труда и една статија во меѓународно научно списание. Има учествувано на три меѓународни проекти. 

Рецензија - ЛИНК.
Одлука за избор - ЛИНК

Роден е 1981 година во Кратово. Дипломирал на Електротехничкиот факултет во Скопје во 2005 година. Магистрирал на Факултетот за електротехника и информациски технологии во Скопје во 2008 година. На Институтот за компјутерска техника и информатика при Електротехничкиот факултет во Скопје почнал да работи од 2005 година прво како демонстратор, во 2007 година e избран во звањето помлад асистент, a во 2009 во асистент. Неговите наставни обврски опфаќаат изведување вежби по предмети од областа на структурирано програмирање, објектно ориентирано програмирање, интернет програмирање, кориснички интерфејси, визуелизација и виртуелна реалност. Во рамките на досегашната научно-истражувачка работа учествувал во изработката на повеќе публикувани научно-истражувачки трудови и три поглавја во книги. Полињата на научно-истражувачки интерес вклучуваат обработка на слики и видео, извлекување на визуелни карактеристики за сликите, содржинско базирано пребарување на мултимедијални податоци, машинско учење.

Рецензија - ЛИНК.
Одлука за избор - ЛИНК

Роден е 1984 година во Велес. Дипломирал на Факултетот за електротехника и информациски технологии во Скопје во 2007 година, на насоката компјутерска техника, информатика и автоматика со просек 10.00, како најдобар во својата генерација. Добитник е на наградата „Златник“ од Универзитетот „Свети Кирил и Методиј“ и „Златен прстен“ од организацијата на инженерите на Македонија. Во 2009-та година ја одбранил магистерската тема и се стекнал со научното звање магистер на електротехнички науки област компјутерска техника и информатика. Докторската дисертација ја одбранил во 2012-та година под менторство на проф. Дејан Ѓорѓевиќ и коменторство на проф. Сашо Џероски на Факултетот за информатички науки и компјутерско инженерство. Своето прво работно искуство го стекнал во Друштвото за компјутерски услуги „Netcetera“ - Скопје, во одделот за софтвер и веб развој. Во рамките на досегашната научно-истражувачка работа, учествувал во изработката на повеќе научни и стручни трудови објавени на домашни и меѓународни конференции и списанија. Полињата на неговиот научно-истражувачки интерес вклучуваат: препознавање на облици, машинско учење и софтверско инженерство.

Рецензија - ЛИНК.
Одлука за избор - ЛИНК

Роден е 1981 година во Скопје. Дипломирал на Електротехничкиот факултет во Скопје во 2005 година. Магистрирал на Факултетот за електротехника и информациски технологии во 2008 година. Во моментов работи на докторската теза од областа на ранливост на комплексни мрежи. Веднаш по дипломирањето започнал со работа на Институтот за компјутерска техника и информатика при Електротехничкиот факултет во Скопје како демонстратор. Од крајот на 2007 година работи како помлад асистент по предметите од областа компјутерска техника и информатика. Во текот на неговиот работен ангажман дава значаен придонес во осмислувањето, креирањето и организацијата на аудиториски и лабораториски вежби. Активно учествувал во истражувања од областа на комплексните и компјутерските мрежи и има објавено 10 научни трудови на меѓународни и домашни конференции и списанија. Учествувал во изработката на 4 книги, како и во поголем број на научно истражувачки и апликативни проекти. Области на негов научно-истражувачки интерес се комплексни мрежи, компјутерски мрежи, безжични мобилни ад хок мрежи, апликативен софтвер и веб технологии, дизајнирање на системи на чип.

Рецензија - ЛИНК.
Одлука за избор - ЛИНК