Во Крушево, од 4-6 мај 2023, се одржа 20-тата меѓународна конференција за информатика и информатички технологии CiiT 2023, организирана и поддржана од Факултетот за информатички науки и компјутерско иженерство (ФИНКИ). На конференцијата беа презентирани 38 труда изработени од приближно 100 учесници, од кои 30 се студенти на ФИНКИ, и евалуирани од меѓународниот програмскиот одбор составен од 63 членови. Дополнително, на конференцијата се одржаа и три поканети предавања од страна на д-р Ѓорѓи Стрезоски од Универзитетот во Амстердам, Холандија, д-р Светлана Кордумова Трајанова - oсновач и извршен директор на Pixyle.ai, и м-р Бојан Најденов од компанијата 44 EAST, Копенхаген, Данска.

Конференцијата ја отворија претседавачите на конференцијата, доц. д-р Бојана Котеска и доц. д-р Александра Дединец, заедно со деканот на ФИНКИ, проф. д-р Боро Јакимовски.

„Една од целите на ова конференција е поголемо вклучување на студентите во научните истражувања кои се спроведуваат на ФИНКИ. Ме радува тоа што бројот на квалитетни студентски трудови расти секоја година“, рече Деканот Јакимовски.

По повод јубилејното 20-то издание на конференцијата, на истата се обрати и претседавачот на првата CiiT конференција, одржана во 2000 година, д-р Смиле Марковски, професор во пензија. По читањето на првиот повик за трудови испратен до вработените на Институтот за информатика при ПМФ, Марковски изјави:

„CiiT за прв пат беше организирана во форма на состанок на кој вработените од ИИ требаше да споделат идеи за идни истражувања. Ми претставува огромно задоволство да сум сведок на денешниот успех на CiiТ, како и на традицијата која е воспоставена.“

Конференцијата финансиски е поддржана од страна на Универзитетот „Св. Кирил и Методиј“ во Скопје, Асоцијацијата „ИКТ-АКТ“, IReason, Netcetera, S&T Macedonia, ITigma, Iskratel, Integra Solution, Inteligneta, ITLabs, Musala soft и Винарија Стоби.

Денес Факултетот за информатички науки и компјутерско инженерство (ФИНКИ), промовираше нова генерација дипломирани инженери по информатички науки и компјутерско инженерство и нова генерација магистри. Рекордни 320 дипломирани инженери и 24 магистри, ги добија своите дипломи за завршен прв и втор циклус студии.

Деканот на ФИНКИ, проф. д-р Боро Јакимовски ја отвори свеченоста и се обрати на присутните:

- Знам дека патот до овде не беше лесен. Имаше препреки и предизвици, но вие покажавте дека можете да ги совладате и да продолжите напред. Нека овој успех ви послужи како основа за вашите идни постигнувања, и се надеваме дека ќе ги користите знаењето и вештините стекнати на ФИНКИ за да направите позитивно влијание во светот на информатиката и компјутерското инженерство, рече деканот на ФИНКИ, професор д- р Боро Јакимовски.

Тој посочи дека успехот и растот на ФИНКИ не се случајни. Тие се резултат на заедничките напори на студентите кои се стремат кон знаење и усовршување и на професорите кои ги инспирираат и ги поддржуваат.

- Нека овој момент на успех остане запаметен во вашите срца, и да ви послужи како поттик во вашите идни професии. Ова е само почетокот на вашата успешна кариера, и сме убедени дека ќе постигнете големи дела и ќе го промените светот низ вашиот талент, ангажман и страст. Заедно, да ги славиме вашите достигнувања и да ја оствариме заедничката визија за успех и напредок, порача Јакимовски.

Ректорот на Универзитетот „Св. Кирил и Методиј“, професор д-р Никола Јанкуловски, ја изрази своето огромно задоволство за промоцијата на инженерите и магистрите.

- Денес, од оваа говорница ја имам честа да Ве поздравам на овој свечен настан, на кој добивате верификација на вашите напори за стекнување на знаења и потврда дека сте успеале да го изодите патот што се нарекува студирање. Денес, нашата академска заедница е побогата со нови дипломирани и магистрирани инженери кои своето знаење го стекнаа на нашиот Универзитет кој е посебен по својот квалитет, традиција, втемелени академски вредности, но и по својата големина, проактивност и диверзитет. Новите технологии брзо се развиваат, стекнатото знаење мора да се надополнува. Образованието е континуиран процес, посебно во делот на новите технологии. Затоа Ве охрабруваме да го продолжите Вашето образование на магистерските и на докторските студии., порача Јанкуловски.
Во своето обраќање тој ги потсети дипломците и магистрите дека стануваат членови на големата алумни заедница на Универзитетот „Св. Кирил и Методиј“ во Скопје.

- Денес со вас се радуваме и гордееме сите. Ние, Вашите наставници и, секако, Вашите семејства. Сега следи уште една многу значајна фаза - натамошното градење на вашите животи, на кариерата, на натамошната академска надградба… Ви посакувам многу здравје и среќа во вашите избори на животните патишта!

Заменик на претседателот на Владата на Република Северна Македонија задолжен за политики за добро владеење, м-р Славица Грковска се обрати на студентите и во своето обраќање истакна:

- Можеби некои од вас можностите ќе ги побараат надвор од границите на државата, некаде каде ќе сметате дека вашите потенцијали ќе бидат повеќе вреднувани. Но, ве уверувам дека вашиот
профил е баран и соодветно вреднуван и овде, во Република Северна Македонија. Европската или американската плата може да се заработи и овде, во Скопје, во Куманово, во Охрид и каде било на друго место во државава, секаде онаму каде досега интернетот и неговите неограничени можности. Одлуката за понатаму е само ваша. Но, што и да одлучите, каде и да се насочите понатаму, се надевам дека ќе ви остане поривот да го помогнете развојот и на својата земја, на домот каде што сте пораснале и образувале. Како претседавач на Националниот совет за дигитална трансформација на општеството, свесна сум колку овие процеси зависат од луѓето како вас. Вашата улога е суштинска во времиња кога драстично се менува начинот на кој работиме и функционираме. Адаптацијата на промените кои ги наметнува технолошкиот развој, и во институциите, и во економијата е невозможна без потенцијалот кој вие го носите во себе.

На свеченоста беа доделени плакети и награди за најдобрите студенти на ФИНКИ, кои беа поддржани и поздравени од претставник на компанијата IWConnect, извршниот директор Миле Грујовски.

Статистиката на ФИНКИ вели дека просечно времетраење на студии на оваа генерација е шест години. Една петтина од дипломците завршиле за ефикасни 4 години и една половина за 5 години. Растот на бројот на дипломирани студенти во однос на минатата година е над 20%. Уште поважно, 46% од нив се девојки со што ФИНКИ е со рамномерна полова застапеност.

Почитувани, 

Ни претставува огромна чест и задоволство да Ве поканиме на промоција на дипломирани и магистрирани студенти на Факултетот за информатички науки и компјутерско инженерство - Скопје. Промоцијата ќе се одржи во Александар Палас на 30-ти март(четврток) со почеток во 12:00 часот. 

На прославата ќе бидат доделени дипломите на сите дипломирани и магистрирани студенти од 2022 година. Дипломираните и магистрираните студенти треба да пристигнат најдоцна до 11:00 часот поради административни и организациски обврски и со нив задолжително да носат лична карта. 
 

Со почит. 

ФИНКИ и оваа година е организатор на меѓународната научна конференција CIIT (International Conference on Informatics and Information Technologies) на која се презентираат трудови од најновите научни достигнувања на истражувачите од земјата и странство. Оваа година, конференцијата ќе се одржи во периодот 4-6.5.2023 година во хотел Монтана, Крушево.

Како и секоја година, така и оваа, ФИНКИ им нуди можност за учество на своите студенти на конференцијата, во посебна категорија на студентски трудови. Студентскиот научен труд треба да се однесува на проект што сте го изработиле или на кој тековно работите. Проектот може да биде изработен во рамки на курсевите на Факултетот, да биде ваш самостоен проект или да биде дел од ваша работа завршена за време на студентска размена или пракса.

Студентите кои се заинтересирани за учество на конференцијата треба да напишат свој студентски труд на кој можат да бидат самостојни автори или пак да имаат други колеги студенти, професори, асистенти или истражувачи како ко-автори. Секој студентски труд треба да има студент како прв и главен автор на трудот.

Согласно објавениот повик за трудови (линкот Submissions на http://ciit.finki.ukim.mk), овие трудови треба:

●      да го користат официјалниот шаблон на конференцијата,

●      да бидат максимум 4 страници,

●      да бидат поднесени преку системот на EasyChair.

●      при поднесувањето да биде назначено дека станува збор за студентски труд (Student Paper), наместо Full Paper или Short Paper.

Рокот за поднесување на студентските трудови е 25.3.2023 година.

Програмскиот комитет на конференцијата ќе направи рецензија, евалуација и селекција на поднесените студентски трудови и најдобрите 10 од нив ќе бидат наградени со бесплатно учество на конференцијата што вклучува платена котизација за настанот, превоз и сместување.

Главните критериуми при евалуација на испратените трудови ќе бидат иновативноста, имплементацијата на најновите трендови во компјутерските науки и инженерство и коректна форма на техничко изразување. Студентските трудови ќе бидат презентирани во специјални студентски сесии и ќе влезат во изборот за најдобар студентски труд.

Освен презентацијата на вашата работа, учеството на конференцијата ќе ви овозможи и да се запознаете со работата на останатите колеги. Затоа, ве покануваме и охрабруваме да земете активно учество во конференцијата.
 

На 15.12.2022 година, на ФИНКИ се одржа првиот тренинг за анализа на научни податоци со KNIME. Тренингот е во рамките на активностите на Отворената лабораторија за истражување во облакот.

Во рамките на повикот за финансирање на научно истражувачки лаборатории кој го распиша МОН во 2021 година, ФИНКИ аплицираше и доби 70% финансирање за формирање на Отворена лабораторија за истражување во облакот.

Лабораторијата се состои од неколку целини. Првата целина претставува кластер за пресметување со високи перформанси базирани на графички процесори, кои во изминатиот период стануваат основно средство за процесирање на големи податоци и вештачка интелигенција (Big data, Artificial Intelligence). Втората целина претставува платформа за процесирање во облак која ќе овозможи брз и едноставен пристап до пресметковни ресурси за истражувачите. Третата целина ќе претставува големо складиште на податоци, кое ќе биде интегрирано со претходните две целини, а во кое истражувачите ќе имаат можност за складирање на своите податочни множества. Исто така во рамки на просторот за складирање на податоци, ќе биде воспоставен и репозиториум на отворени податочни множества (open datasets) каде истражувачите ќе можат јавно и отворено да ги публикуваат податочните множества и резултати, со што ќе се зголеми нивната видливост и можност за соработка и имплементација постулатите на отворена наука.

Во рамките на активностите на проектот предвидено е и организирање на обуки за корисниците, по што ќе следи отворен повик за истражувачите за користење на ресурсите на оваа значајна лабораторија.

Првата обука се однесуваше на алатката KNIME (https://www.knime.com/) за анализа на податоци, со визуелен интерфејс, без кодирање, што ја прави оваа платформа соодветна за луѓе од различни области. Беше претставен процесот на креирање на аналитички модели, почнувајќи од едноставни, до по сложени модели на машинско учење. Практично беа прикажани примери за анализа, предвидување, класификација и кластерирање на податоци од различни области, како од медицината, економијата, енергетиката и сл. 

Предавачи беа вонр. проф. д-р Мирослав Мирчев и доц. д-р Александра Дединец од ФИНКИ.

Во следниот период ќе се одржат и други слични настани, ориентирани кон анализа на податоци од специфични домени.

Во рамките на проектот CleanBreathe на ФИНКИ, а во соработка со Магдебург-Стендал универзитетот за применети науки од Германија, оваа недела, од 4.12.2022 до 9.12.2022 организирана е работилница во која учествуваат студенти од Германија и студенти од ФИНКИ.

Проектот CleanBreathe е проект на ФИНКИ при Универзитетот Св. Кирил и Методиј во Скопје чии цели се:

1. Зголемување на свесноста за загадувањето преку едукација и директно учество на граѓаните
2. Користење на голем број, ефтини сензори за предвидување на загадувањето
3. Градење на оддржлив бизнис модел за продукти и апликации кои го мерат загадувањето и ја зголемуваат свесноста за проблемите со загадувањето.

Целта на работилницата е зголемување на свеста за загаденоста на воздухот преку интервенции и иновативен дизајн на продукти и апликации. Презентацијата на проектите на студентите ќе се оддржи во петок, 9.12.2022 од 14:00 во просториите на Netaville.

На 24.11.2022 година во технолошкиот парк во Болоња, Италија беше отворен суперкомпјутерскиот систем Леонардо, во моментов 4. пласиран на Top500 листата на најбрзи суперкомјпутери на светот. Системот е заедничка инвестиција на Италија и Европската унија преку EuroHPC JU. Имајќи предвид дека нашата земја е рамноправна членка на EuroHPC JU, македонските истражувачи имаат можност да се пријавуваат на отворените повици за активно користење на овој, но и другите системи обезбедени со поддршка на EuroHPC JU. ФИНКИ, како Национален Центар за компетенции и како институција која на национално ниво го има мандатот да ги кооридинира активностите во рамките на EuroHPC JU е на располагање на сите истражувачи, но и компании од земјата за поддршка за користење на проецесирање со високи перформанси (HPC) и аплицирање за европските ресурси за таа намена. На свеченото отварање на Леонардо, беше присутен д-р Анастас Мишев, редовен професор на ФИНКИ.

Системот Леонардо се состои од 4992 пресметувачки елементи, распоредени во 155 ормари, поставен на преку 600м2 простор, со вкупно 2800 Терабајти RAM меморија и преку 110 Петабајди простор за складирање. Врвните перформанси достигнуваат 250 PetaFLOPS. Вкупната потрошувачка на енергија е околу 6000 kW.

Универзитетот „Св. Кирил и Методиј“ во Скопје има континуирана заложба да ја поддржува научноистражувачката работа. Секоја година на Светскиот ден на науката за мир и развој, 10-ти Ноември, се доделува Награда за избор на најдобри научници/уметник на Универзитетот „Св. Кирил и Методиј“ во Скопје, за покажани врвни резултати во научноистражувачката дејност во текот на календарската година.

Оваа година, тројца професори на ФИНКИ се стекнаа со престижни награди во рамките на оваа манифестација.

Во научното подрачје на техничко-технолошки науки, за најдобар научник со врвни резултати за 2021 година е избран д-р Петре Ламески, вонреден професор на ФИНКИ. Истиот професор минатата година беше добитник на наградата за успешни млади за 2020 година во категоријата најдобар млад научник во природно-математички и технички науки, која ја доделува претседателот на државата, Стево Пендаровски.

Професорот д-р Марјан Гушев, редовен професор на ФИНКИ доби признание за посебен придонес во науката за исклучително достигнување во кариерата и објавени повеќе од 100 научни трудови афилирани на Универзитетот, индексирани во базата Web of Science (158 заклучно со 2021) како и за најголем број научни публикации на Web of Science во изминатата деценија 2011 – 2020.

Академик проф. д-р Љупчо Коцарев, редовен професор (во пензија) на ФИНКИ, исто така доби награда за исклучително достигнување во кариерата и објавени повеќе од 100 научни трудови афилирани на Универзитетот, индексирани во базата Web of Science (106 заклучно со 2021) како и за исклучително достигнување во кариерата и меѓународно признаена извонредност преку застапеност во листата на Stanford Универзитетот за 2% најцитирани научници на планетата за целата кариера, заклучно со 2021.

Добиените награди се потврда на посветеноста на наставниот кадар на ФИНКИ за континуиран развој на науката. Наградите се мотивација за понатамошен развој на науката и за уште поголеми достигнувања во иднина. Големата активност во науката и посветеноста на научниот развој, му овозможува на ФИНКИ континуирано да ги модернизира своите студиски програми и им овозможува на своите студенти запознавање со најновите научни достигнувања во науката и техниката. Со тоа, студентите кои студираат на ФИНКИ се здобиваат со огромна предност во своите знаења и компетенции и се едни од најбараните инженери по информатички науки и компјутерско инженерство на пазарот на трудот во регионот.

Почитувани студенти,

Ве известуваме дека на 03.10.2022 година во 15:00 часот во Филхармонија на Република Северна Македонија ќе се одржи првиот академски час за учебната 2022/2023 година на Факултетот за информатички науки и компјутерско инженерство при Универзитетот „Св. Кирил и Методиј“ во Скопје.

На првиот академски час се поканети сите новозапишани студенти.

Наставата почнува во вторник (04.10.2022) согласно распоред кој ќе биде дополнително објавен на нашата веб страна. Предавањата ќе се одвиваат со физичко присуство.