Почитувани студенти,

Во рамки на курсот Виртуелна реалност, се организира хакатон штој ќе служи и како испит за студентите кои се запишани на курсот. Сепак, хакатонот е отворен и за други студенти од ФИНКИ кои не се запишани на курсот, но, имаат интерес и познавања за развој на апликации во виртуелна реалност.

Датум на одржување: 28.06.2025 со почеток во 09:00 часот

Локација: ФИНКИ (просторијата ќе биде дополнително истакната)

Времетраење: 4 часа + презентација на изработените апликации

Цел на хакатонот

Развој на апликација за виртуелна реалност што симулира една виртуелна околина на некоја од наведените теми: 

1. „Времеплов на науката“ - Корисникот минува низ клучни научни откритија (откривање на ДНК, првиот лет, итн.) – со интерактивни елементи.

2. „Еволуција на знаењето“ - Корисникот патува низ симболично дизајниран музеј каде секоја просторија претставува научна парадигма.

3. Апстрактни светови: визуелизација на емоции“ - Корисниците имаат можност да истражуваат апстрактни концепти како што се меморија, страв, тага, љубопитност итн. во ВР (на пример: светот на стравот, на љубопитноста, …). 

Точната тема ќе биде дадена за време на хакатонот.

Технички насоки

Целната платформа е мобилен уред со 3D Box, Oculus Quest (или друга во договор со наставниците). Се препорачува користење на Unity, Unreal Engine, Godot. 

Можат да се користат различни достапни ресурси, но мора да бидат наведени. 

За време на хакатонот може да носите сопствен компјутер и/или уред за виртуелна реалност или може да работите на компјутерите во лабораториите на ФИНКИ и да ги користите уредите со кои располагаме.

Тимовите треба да презентираат

• кратко демо на апликацијата,

• опис на функционалностите,

• оригиналност на апликацијата,

• технички пристап.

Правила за формирање тимови

• Тимовите треба да се состојат од најмногу 4 члена, но може да работите и како поединец.

• Сите членови на тимот треба да се студенти на ФИНКИ

• Тимот може да биде составен:

  • само од студенти запишани на курсот Виртуелна реалност или

  • само од студенти на ФИНКИ кои не го посетуваат курсот.

• Комбинирање на студенти од двете категории во еден тим НЕ е дозволено.

Регистрација

Секој тим треба да се пријави најдоцна до 24.06.2025 година до крајот на денот на овој линк: https://docs.google.com/forms/d/e/1FAIpQLSfQD1Yj6dnMAnzjIeFTd8vn299zQ3OoGR3g1cybjTFPpxXPtg/viewform?usp=header.

Оценување

Апликациите ќе бидат оценувани според следниве критериуми:

• иновативност,

• корисничко искуство во VR,

• техничка стабилност,

• едукативна вредност,

• комплетност на изработената апликација.

Важна препорака:
Се препорачува пред да се пријавите на анкетата да креирате минимална тест апликација во платформата со која планирате да ја развивате апликацијата и наменета за планираната целна платформа за да сте сигурни дека добро функционира и можете да ги користите за време на хакатонот.

Членовите на тимот на победничката апликација ќе добијат пригодна награда. 

Хакатонот е во организација на ФИНКИ, а ќе биде поддржан и од Асоцијацијата ИКТ-АКТ и ИЕЕЕ.

Ова е одлична можност да го демонстрирате стекнатото знаење, да соработувате во тим, и да се изразите креативно преку технологија на иднината.

Од одговорните на предметот Виртуелна реалност

Проф. д-р Сузана Лошковкска

Вон. проф. д-р Катарина Тројачанец Динева

A1 Македонија ги отвора вратите за идната генерација на млади професионалци преку практикантската програмата A1 WayUp

И оваа година, петта по ред, A1 Македонија ја реафирмира својата посветеност кон поддршката на младите таленти, преку уникатната платена програма за пракса – A1 WayUp. Програмата нуди извонредна можност за најперспективните студенти да го направат првиот чекор во својата професионална кариера, во рамки на некои од најдинамичните и значајни области: автоматизација, анализа и визуелизација на податоци, развој на платформи, IT инфраструктура, сајбер безбедност, технички сервиси, ИКТ решенија, корпоративни комуникации, бизнис трансформација и човечки ресурси.

Програмата започнува на 1 октомври 2025 година и трае шест месеци со полно работно време односно 40 часа неделно. Учесниците ќе бидат целосно интегрирани во работниот процес на A1, ќе работат на реални и иновативни проекти и ќе имаат континуирана поддршка од искусни ментори и експерти од својата област. Како дел од тимот, ќе уживаат бенефиции еднакви на оние на сите вработени во компанијата.

Преку структурирани обуки и пристап до напредни ресурси, A1 WayUp овозможува стекнување на практични знаења, развој на професионални вештини и подготвеност за идни предизвици во бизнис и технолошката сфера.

Повикот за аплицирање е отворен од 23 јуни до 27 јули 2025 година, за 12 отворени позиции. Заинтересираните студенти треба да достават кратка биографија преку кариерната страница на A1 Македонија, избирајќи една од достапните позиции во рамките на програмата.

Процесот на селекција опфаќа проценка на потребните компетенции, анализа на личните карактеристики и завршно интервју, со цел идентификување на кандидатите кои најдобро се вклопуваат во организациската култура и динамиката на A1.

Избрани ќе бидат 12 студенти, кои ќе добијат можност да започнат со својата професионална трансформација во реномирана компанија која ги негува иновацијата, развојот и талентот.

Апликациите за A1 WayUp – Generation ’25 можат да се поднесат на следниот линк.