27/11/2011
Факултетот за информатички науки и компјутерско инженерство и компанијата ФХ3Х, потпишаа меморандум за соработка која ќе резултира со воведување на нови предмети во студиските програми на Факултетот, менување и прилагодување на содржините на постоечките предмети, воведување и користење на нови софтверски алатки во рамките на лабораториските вежби, сè со цел да се одговори на тековните барања на пазарот на труд.
„Соработката со индустријата е еден од главните приоритети за ФИНКИ“ вели деканот на ФИНКИ, проф. д-р Димитар Трајанов. „За таа цел направивме студиски програми кои продуцираат кадри кои ќе имаат доволно специјализирано практично знаење за да можат веднаш да почнат со работа на реални проекти во компаниите. Во оваа насока соработката ќе се одвива преку директно вклучување на компаниите во ажурирањето на студиските програми, потоа преку нивно учество во изведувањето на наставата каде експерти од ИТ индустријата ќе им предаваат на студентите за технологии кои тие ги користат. Се разбира, останува и соработката во поглед на пракси, семинарски работи и вработувања“, вели Трајанов.
Суперкомпјутер на ФИНКИ
Благодарение на Проектот за инвестирање на 60М ЕУР во истражувачки лаборатории на Министерството за образование и наука и Владата на Република Македонија, Факултетот за информатички науки и компјутерско инженерство ќе го добие на управување, досега најмоќниот, кластер со високи перформанси (High-Performance cluster) во Македонија. Суперкомпјутерот се очекува да биде ставен во функција во текот на месец јануари 2012 година. Пресметковниот потенцијалот кој го овозможува кластерот, пред сè е наменет како поддршка на сите истражувачи од Македонија кои имаат потреба од пресметки со високи перформанси, како и истражувачи заинтересирани во проблемите поврзани со пресметувањето со високи перформанси. Досега македонските истражувачи, во рамките на неколку меѓународни проекти, како на пример проектот HP-SEE имаа можност да ги користат регионалните HPC ресурси. Со инсталацијата на овој голем ресурс, значително ќе се подобрат истражувачките потенцијали, не само во областа на информатиката, туку и во областите на компјутерската физика, хемија, технички науки и др.